خصوصی رپورٹس    

حب صدر کے بیٹے پر بم حملہ 3 جاں بحق

حب، کراچی‘ لاہور (مانیٹرنگ ڈیسک، ایجنسیاں) دھماکہ اس وقت ہوا جب صدر مملکت ممنون حسین کے بیٹے سلیمان ممنون اپنے قافلے کے ہمراہ فارم ہاﺅس سے واپس آرہے تھے۔ دھماکا خیز مواد موٹر سائیکل میں نصب کیا گیا تھا۔ واقعہ میں سلیمان ممنون کے سکواڈ میں شامل موبائل کو بھی نقصان پہنچا۔ اے ایس آئی سمیت پانچ اہلکار زخمی ہوگئے تاہم وہ خود محفوظ رہے۔ پولیس کے مطابق جاں بحق ہونے والے تینوں افراد راہگیر تھے۔ واقعہ کی اطلاع ملتے ہی حکام موقع پر پہنچ گئے۔ زخمیوں کو آغا خان ہسپتال منتقل کردیا گیا ہے جہاں انہیں طبی امداد دی جارہی ہے۔ وزیر داخلہ سندھ سہیل انور سیال نے انہیں بہترین طبی امداد کی فراہمی کی ہدایت کی ہے۔ ڈی ایس پی کے مطابق پانچ پولیس اہلکاروں سمیت 15 زخمی ہسپتال لائے گئے۔ ذرائع کے مطابق صدر ممنون حسین کے صاحبزادے پر حملہ اس وقت ہوا جب وہ حب چوکی کے قریب اپنے بھینسوں کے باڑے سے واپس آرہے تھے۔ ذرائع کا کہنا تھا کہ ممنون حسین کے صاحبزادے کی حفاظت کیلئے پولیس کی دو موبائل گاڑیاں مختص ہیں جس پر بعض حلقوں نے اعتراض بھی اٹھایا تھا کہ انہیں اپنے ذاتی کاروبار کیلئے دو حفاظتی پولیس فراہم کی جارہی ہے۔ ممنون ایک مخصوص وقت پر اپنے فارم ہاﺅس آتے جاتے ہیں۔ گزشتہ روز ان کے مخصوص روٹ پر حملہ کیا گیا تاہم وہ بال بال بچ گئے۔ وزیراعلیٰ بلوچستان ڈاکٹر عبدالمالک بلوچ نے حب میں ہونے والے دھماکے کی شدید مذمت کرتے ہوئے واقعہ میں قیمتی جانی نقصان پر دکھ اور افسوس کا اظہار کیا ہے جبکہ انہوں نے واقعہ کی فوری رپورٹ طلب کرتے ہوئے واقعہ میں ملوث عناصر کی گرفتاری کے لئے تمام دستیاب وسائل بروئے کار لانے کی ہدایت کی ہے اپنے ایک بیان میں وزیراعلیٰ نے کہا ہے کہ دہشت گردی کا یہ واقعہ نہایت بہیمانہ اور بزدلانہ کارروائی ہے جس میں معصوم اور بےگناہ افراد کو نشانہ بنایا گیا۔ وزیراعلیٰ نے اس عزم کا اعادہ کیا ہے کہ دہشت گردی کے مکمل خاتمے کو ہر صورت یقینی بناتے ہوئے صوبے میں امن قائم کیا جائے گا اور عوام کے جان ومال سے کھیلنے والوں کو کیفر کردار تک پہنچانے میں کوئی کسر اٹھا نہیں رکھی جائے گی۔ وزیراعلیٰ نے دھماکے کے زخمیوں کو بہترین طبی سہولتوں کی فراہمی کی ہدایت کی ہے جبکہ انہوں نے واقعہ میں جاں بحق ہونے والے افراد کے لواحقین سے ہمدردی اور تعزیت کا اظہار کرتے ہوئے مرحومین کی مغفرت کی دعا کی ہے۔

Mazeed News
حب صدر کے بیٹے پر بم حملہ 3 جاں بحق

قومی خبریں    

بین الاقوامی خبریں    

سپورٹس    

شوبز    

دلچسپ و عجیب    

صنعت و تجارت